Proposicións non de lei aprobadas polo Pleno do Parlamento de Galicia o 25 de xuño de 2025

​

Proposicións non de lei en Pleno

​

Aprobación sen modificacións

- 26615 (12/PNP-002140)

Grupo Parlamentario Popular de Galicia

García Comesaña, Julio e trece deputados/as máis

Sobre as demandas que a Xunta de Galicia debe realizar ao Goberno de España en relación coa protección ambiental e posta en valor do río Miño no seu treito internacional

BOPG nº 206f1, do 04.06.2025

Sométese a votación e resulta aprobada sen modificacións por 49 votos a favor, ningún voto en contra e 24 abstencións.

O texto aprobado é o seguinte:

«O Parlamento de Galicia insta a Xunta de Galicia a, no marco das súas competencias, dirixirse ao Goberno de España para:

1. Dar resposta desde o Ministerio para a Transición Ecolóxica á solicitude de reunión formulada polo alcaldes de todos os concellos afectados, para abordar diversas problemáticas no ámbito das súas competencias sobre o treito internacional do río Miño.

2. Analizar o cumprimento do caudal ecolóxico mínimo e o impacto das oscilacións de caudal brusco no treito internacional do río Miño e sobre a fauna piscícola fluvial.

3. Abordar, en colaboración co resto de administracións, incluídas as autoridades portuguesas, a prevención e control de especies exóticas e invasoras, tanto na lámina de auga como nas marxes do río, para preservar a biodiversidade autóctona.

4. Promover diante dos organismos competentes a recuperación da dragaxe controlada e ambientalmente sustentable do treito internacional do río Miño como ferramenta para garantir a navegabilidade e a seguranza.

5. Facilitar aos concellos e particulares o cumprimento das obrigas en materia de xestión da biomasa.

6. Instar a actualización do regulamento de navegación no río Miño, tendo en conta a evolución das actividades recreativas e deportivas e a diversidade de embarcacións.

7. Solicitar un reforzo da inspección e o control das embarcacións dedicadas ao transporte de pasaxeiros, exixindo o cumprimento das garantías de seguranza, legais e fiscais, e fomentando a cooperación coa administración portuguesa para garantir un servizo seguro, ordenado e regulamentado.

8. Reforzar a protección estrutural e patrimonial das pesqueiras existentes no río.»

Aprobación con modificacións

- 25541 (12/PNP-002033)

Grupo Parlamentario dos Socialistas de Galicia

Espinosa Mangana, María Elena e Longueira Castro, Silvia

Sobre a demanda dirixida á Xunta de Galicia co fin de que elabore un novo plan de saúde mental

BOPG nº 200f1, do 20.05.2025

Sométese a votación por puntos, co seguinte resultado:​

Punto 1: aprobado, con modificacións respecto do texto orixinal, pola unanimidade dos 73 deputados e deputadas presentes.

Punto 2: rexeitado, por 33 votos a favor, 40 votos en contra e ningunha abstención.

O texto aprobado é o seguinte: 

«O Parlamento galego insta a Xunta de Galicia a elaborar un novo plan estratéxico de saúde mental (PESM) que recolla as necesidades reais, baseado tamén nas experiencias obtidas, que sexa participativo co persoal especializado en saúde mental e que dea resposta ás necesidades de saúde mental dos galegos e as galegas.»

Aprobación por unanimidade con modificacións

- 24126 (12/PNP-001909)

Grupo Parlamentario Popular de Galicia

Pérez López, Noelia e oito deputados/as máis

Sobre a demanda dirixida á Xunta de Galicia co obxecto de que reclame a transferencia das competencias en materia de permisos de residencia e de traballo para migrantes

BOPG nº 192f1, do 30.04.2025

Sométese a votación e resulta aprobada, con modificacións respecto do texto orixinal, pola unanimidade dos 73 deputados e deputadas presentes.

O texto aprobado é o seguinte:

«O Parlamento de Galicia insta a Xunta de Galicia a iniciar os trámites para reclamar o traspaso das competencias executivas en materia das autorizacións iniciais de traballo das persoas migrantes, para poder habilitar un proceso que reduza os prazos para obter esta documentación.»​