Patricia Iglesias Rey

Nacemento: Carballo -

Grupo Parlamentario dos Socialistas de Galicia

A Coruña

Biografía:

Xurista con gran vocación de servizo público, feminista, progresista e con fortes conviccións de xustiza social e igualdade.

Letrada da Xunta de Galicia, logo de superar a oposición no ano 2005 ao corpo Superior da Administración Xeral da Comunidade Autónoma Galega (subgrupo A1- escala letrados/as). Ocupou distintos postos como letrada en diferentes consellerías, sociedades e axencias públicas da Xunta de Galicia. Dende maio de 2019 foi designada letrada maior do Consello de Contas de Galicia, órgano fiscalizador das contas públicas do sector público galego.

É a coordinadora galega da Asociación de Mulleres no Sector Público, unha asociación de base nacional que aglutina case mil socias e que ten como obxectivo dar maior visibilidade ao talento e ao traballo que desenvolven as empregadas públicas nas diferentes administracións públicas, á presenza paritaria das mulleres no seu seo e ás medidas de corresponsabilidade.

A súa traxectoria profesional centrouse no asesoramento xurídico e na defensa en xuízo, moi especialmente no ámbito do dereito público e nos sectores regulados como o industrial, o enerxético e o mineiro, ao ocupar durante máis de oito anos a asesoría xurídica da consellería da Xunta de Galicia con competencias en economía, industria e innovación. Tamén destaca a súa especialización nos eidos da contratación pública, da integridade institucional e da transparencia e bo goberno.

Directora e relatora de cursos, mestrados e conferencias organizados por diferentes universidades e escolas oficiais das administracións públicas en temas relacionados coas distintas áreas do dereito administrativo. Autora de artigos doutrinais e coautora en obras colectivas sobre contratación pública, subvencións públicas, integridade institucional e prevención da corrupción.

Membro do grupo de integridade da contratación pública da FEMP. Forma parte da Sección de Public Compliance do Consello Superior de Letrados de Comunidades Autónomas.